Nunanit allanit eqqussuineq nunanillu allanik niueqateqarnerup kisitsisitai pingaarnerit
Aalisakkanik piniagassanillu tunisassiat saniatigut Kalaallit Nunaanni nioqqutissat ikittuinnaat suliarineqartarput. Taamaattumik nioqqutissat angerlarsimaffinni, inuussutissarsiutitigut suliffeqarfinni, paaqqinnittarfinni aammalu aningaasaliissutissanut atugassat tamarluinnangajammik eqqussugaasarput.
Titartagaq 1. Nioqqutissat nunanit allanit eqqussukkat 2012-mi agguataarsimanerat
Najoqqutaq: Naatsorsueqqissaartarfik
Titartagaq 1-mi takuneqarsinnaapput nioqqutissat nunanit allanit eqqussukkat agguataarsimanerat. Nioqqutissat eqqussukkat annertunersaat, 59 procentingajaat Danmarkiminngaaneersuupput. Danmarkimiilli eqqussukkat katinnerannut ilanngunneqartarput nioqqutissiat nunanit allaneersut, Danmarki aqqutigalugu eqqusorneqartartut. Eqqussukkat erseqqinnerusumik nunanut agguarneqarnerat Tabel 2-mi takuneqarsinnaavoq.
Kalaallit Nunaata tunisassianik nunanut allanut niuernerani pingaarnerit 88 procentit missaat aalisagaapput qalerualiullutillu. Inuussutissarsiornermi ataatsiinnarmik tunngaveqarnerup nunani tamalaani akit allanngoriartornerat aningaasaqarnermut apeqqutaalluinnarpoq. Ukiuni kingullerni guulti olivenilu Kalaallit Nunaata nunanut allanut niuernerani pingaaruteqarneruleriartorput.
Titartagaq 2. 2012-mi avammut nioqqutit agguataarnerat
Najoqqutaq: Naatsorsueqqissaartarfik
2012-mi Kalaallit Nunaata nunanut allanut tunisassiami 91 procentii Danmarkimut tunivai. Tunisassiat Danmarkimut tunisassiarineqartartut pingaarnersaraat aalisakkat qalerualillu, taakku Danmarkimi suliareqqinneqareeraangamik nunanut allanut tunineqaqqittarput, nunat tunisiffigineqarnerpaasartut tassaapput Japan aamma Storbritanien.
Titartagaq 3. Raajat qalipallit avammut nioqqutigineqartut annertussusiisa agguaqatigiissillugu akiisa nikinganeri. 1988=100
Najoqqutaq: Naatsorsueqqissaartarfik
Titartagaq 4. Raajat qalipaajakkat avammut nioqqutigineqartut annertussusiisa agguaqatigiissillugu akiisa nikerarneri. 1988=100
Najoqqutaq: Naatsorsueqqissaartarfik
Agguaqatigiissillugu raajanut qalipaajarneqanngitsunut raajanullu qalipaajakkanut kiilumut akianut nunanut allanut tunineqartunut naleqassutsit naleqqersuutaasa ineriartornerat Titartagaq 3-mi aamma 4-mi takutinneqarput, tamatumani 1988 ukiutut aallaavigitinneqarpoq.
Raajanut qalipaajarneqanngitsunut tunngatillugu 1989-miilli taakkua akikillisimapput, tamatumani akit 55 procentit missaanik apparsimallutik. Annertussusiat 1988-ip kingornali 36 procenit missaanik qaffariarsimapput.
Raajanut qalipaajakkanut tunngatillugu tamatumani aalaakkaannerusumik akit appariartorsimapput, pingaartumilli 1990-ip kingorna. Tamanna pingaartumik Islandip raajanik Flemish Capimi pisarineqartunik akilutsitsivallaarneranik pissuteqarpoq, taamaalillutillu 1990-ikkut aallartinnerannili nunarsuarmi raajat akii apparujussuarsimapput. Paarlattuanilli 1988-miilli annertussutsit 138 procentinik qaffariarsimapput.